Keçid linkləri

2024, 28 Mart, Cümə axşamı, Bakı vaxtı 21:12

Başı kəsilən adam


Hicran Əliyevin rəsmi
Hicran Əliyevin rəsmi
-

"Ədəbi Azadlıq-2014" müsabiqəsinin Şeir 20-liyindən


Elşən Əzim


BAŞI KƏSİLƏN ADAM

Yaxın şərqdə hələ də cəza tədbiri kimi insan başı kəsilir. Və bu hərəkəti əvvəldən axıra kimi lentə alıb dünyaya yayımlayırlar.


Sifətin avazıyıb
üzünə qorxun çıxıb.
Qorxudan elə sənin
Diriykən qırxın çıxıb.

Cəlladın bıçağına
Dözə-dözə nə gördün.
Bu dünyaya bədənsiz
Baxdın, təzə nə gördün?

Qəm eləmə hər canın
Bir fitrə-zəkatı var.
Bu dünyanın nə qədər
Başsız məmləkəti var.

Gözümüzdən əriyib
Yaş gedəndə neyniyək?
Tanrının hüzuruna
Boş gedəndə neyniyək?
Papaq getdi neynədik
Baş gedəndə neyniyək
Başı kəsilən adam.

Elə mən də cəlladam,
Toyuq başı kəsmişəm,
Quzu başı kəsmişəm.
Ürəyimdə nə qədər
Arzu başı kəsmişəm.

Adamları başkəsən
Dünyanın daş başına.
Baş şəkli döydürürlər
Başsızın baş daşına.
Baş var ki, ha dartırsan
Manqurt papağı çıxmır
Eh bəxtəvər başına.
Başı kəsilən adam.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG